Erabiltzaile-datagramen
protokoloa (UDP)
UDP protokoloa OSI
erreferentzia-ereduko garraio-mailako (laugarren mailako) eta konexiorik gabeko
protokoloa da; hau da, datuak transmititzeko, ez da beharrezkoa hartzailea ere
sarera konektatuta egotea. Ez du hartu izanaren adierazpenik bidaltzen, eta ez
du erroreak detektatzeko sistemarik. Horregatik, beste protokolo batzuk baino
azkarragoa da, baina, era berean, beste protokolo batzuk baino fidagarritasun
txikiagoa ere badu, ez baitu bermatzen datagramak helburura iritsiko direnik.
TCP protokoloaren ordez
erabiltzen da, betiere fidagarritasun handia behar ez duten transmisioak
egiteko. Adibidez, pakete txikiak transmititzeko edo irudia eta ahotsa denbora
errealean transmititzeko erabiltzen da (galdutako paketeak ez dira kontuan
hartzen, denbora errealeko transmisioetan ez baitago informazioa berriro
bidaltzeko denborarik). Bestalde, UDP protokoloa informazioa hartzaile
ugarirengana (multidifusioa) edo
hartzaile ororengana bidaltzeko ere erabiltzen da. Izan ere, datagramak
hartzaile guztiengana iritsi edo ez, sistemak berdin jarraitu behar du
datagramak bidaltzen. Gainera, hartzaile guztiek jaso izanaren adierazpena
bidaliko balute, sistema kolapsatzeko arriskua egongo litzateke.