Antena
Antenaren luzera seinalearen maiztasunaren
araberakoa da; hain zuzen ere, uhin-luzeraren balio bera edo horren zatiki
erabilgarriaren balio bera izan behar du. Horregatik, adibidez, irrati‑uhinak
hartzeko antenak telefonia mugikorreko antenak baino luzeagoak dira. Luzeraz
gain, beste faktore batzuk ere kontuan hartzen dira antenak sailkatzeko.
Norabidea kontuan hartuz gero, bi eratako antenak
aurki daitezke: batetik, antena
direkzionalak, norabidearen arabera energia gehiagoko edo gutxiagoko uhin
elektromagnetikoak igortzen dituztenak eta seinaleak ere hein handiagoan edo
txikiagoan hartzen dituztenak; bestetik, norabide
orotako antenak, norabide guztietan energia bereko uhinak igortzen
dituztenak eta norabide guztietatik seinaleak hein berean hartzen dituztenak.
Osagai-kopuruaren arabera, berriz, bi eratakoak
izan daitezke, oro har: polo bakarreko
antenak, osagai aktibo bakarra dutenak, eta bi poloko antenak, seinalea bi osagairen bidez jasotzen dutenak.
Gaur egun, gainera, beste antena-mota bat ere erabiltzen da: MIMO antena
(Multiple Input Multiple Output) edo sarrera anitzeko eta irteera anitzeko
antenak; azken horiek hainbat antena elkartuta sortzen dira, eta egitura
horrek antenen errendimendua handitzea du helburu.
Irabaziari dagokionez, bi antena-mota bereizi ohi
dira: irabazi handiko antena,
norabide jakin bateko uhin elektromagnetikoak hartzeko gaitasun handia duena,
eta irabazi txikiko antena,
errendimendu txikiagoa duena.
Azkenik, uhin elektromagnetikoa zein norabidetan
polarizatzen duten kontuan hartuz gero, antena
bertikalak, horizontalak, eliptikoak eta zirkularrak daude.
Antena-mota horiekin guztiekin batera, antena parabolikoak ere aipatu behar
dira; parabola-formari esker, gainazalera heltzen diren seinale ahulak fokuko
hargailu-igorgailuan kontzentratzen dituzte, eta, hartara, sistemaren
errendimendua areagotzen dute.
Amaitzeko, esan beharra dago antenak
sailkatzerakoan kontuan hartu beharreko beste faktore batzuk ere badirela, hala
nola maiztasuna, potentzia, etab.